2018-(e)ko urria-ren 25-a, osteguna

Hazilan programaren laugarren edizioan izena emateko epea zabalik dago

Durangoko Merinaldearen Amankomunazgoak – Durangaldeko Behargintzak gazteen laneratzea sustatzeko HAZILAN programaren laugarren deialdia zabaldu du. Ekimen honek laneratzeko bidea hobetzeko ekintzen ibilbide osatu bat eskaintzen die goi mailako ikasketak dituzten (unibertsitate titulua edo goi mailako prestakuntza zikloa) eta lana aurkitu ezinik dabiltzan pertsonei.

Laugarren edizio hau 2018ko abenduan hasiko da martxan eta parte hartzeko interesa duenak hitzordua eskatu dezake Durangaldeko Behargintzan, azaroaren 15a baino lehen.

Programa honetako partaideek prestakuntza pertsonalizatua jasoko dute. Lehen fase batean (Aktibatu), euren gaitasun pertsonalak eta profesionalak hobetzeko trebakuntza jasoko dute, lan mundura sartzea erraztuko dieten erreminten bitartez. Bigarren fase batean (Kokatu), enpresetan praktikak egiteko aukera izango dute. Honela, lan munduko errealitatea gertutik ezagutzeko aukera izango dute.

32 lagun · Hazilan programako aurreko hiru edizioetan, oro har, 32 lagunek hartu dute parte. Horietatik guztietatik, 22k lana aurkitu dute.

Hazilan proiektua Garapen elkarteak koordinatzen du (Garapen Agentzien Euskal Elkarteak). Euskadiko Programa Operatiboaren baitan kokatzen da eta Europako Gizarte Funtsak finantzatzen du %50ean.